الام المضغوطة

السلام عليكم ورحمة الله وبركاته

بتكلم اليوم عن موضوع مهم 

عن الام المضغوطة

 وكيف تعطين نفسك حقها واطفالك وبيتك حقهم

لكن

ضروري يالام تعرفين انك تحتاجين وقت خاص

 او وقت راحه يكون بيومك

 المده انت تحددينها حسب ظروفك 

لا تتنازلين عنه ابداً رتبي اوضاعك وسويه

تقدرين تمارسين فيه هواياتك او تسوين فيه اي شيء تحبينه 

او تروحين مشغل او رياضه اي شيء تحبينه 

ومو شرط يكون طلعه من البيت

يعني مثلاً لو اطفالك يومياً ينامون بدري ٧ ونص او ٨ 

 تقدرين بعدها يكون لك وقتك الخاص

او اللي زوجها يساعدها تقدر تخليهم يطلعون معاه 

حديقه او يمسكهم لها

او عادي تتركينهم بمكان آمن وتحطين

 كاميرا وتدخلين غرفتك

او اذا كان عندك احد منهم كبير 

ممكن ينتبه للصغير

المهم تاخذين وقت راحه

وقت تلتقطين فيه انفاسك وتريحين

وترجعين بطاقة حلوه

كنك تسوين ستوب للاشغال والامومه

وترجعين لها

الشيء الثاني مهم تعلمين اطفالك تحمل المسؤوليه

 مو كل شيء تسوينه انت وكل عمر له مهام خاصة فيه، 

ضروري يكون فيه قانون في البيت ونظام وينشرح للجميع وتتناقشون فيه والكل يمشي عليه

هذي من الشغلات اللي بتساعدك

وكل ماكبر الطفل زادت مسؤوليته ومهامه عادي

هنا فكرة عن

قوانين المنزل

وهنا

والشيء الاهم ابتعدي عن المثاليه كوني ام سعيدة فقط 

يعني عندك اطفال بعمر صغير طبيعي يكون البيت مكركب ! والعاب بكل زاويه ! 

هذي مساحتهم وهذي طريقة لعبهم لازم نفهم انهم اطفال وهذي مرحلة بحياتهم ورح تنتهي خلوهم يعيشونها يعني طبيعي الطفل يتحرك ويصرخ ويخرب ويلعب

لازم يجرب عشان يتعلم

ساعديه بالانشطه ووفري لهم مساحة في البيت وحطي لهم ضوابط .. ماقول فكي كل شيء وخلي يخرب لا طبعاً .. 

يعني المطبخ سكريه غرفتك سكريها 

خلي لهم غرفة اللعب والصاله وخليهم يستمتعون واذا غلطوا عادددي طولي بالك لا تعصبين لازم صبر وتجاهل وخليهم يصلحون غلطهم هنا رح تساعدينهم يفهمون ويتعلمون

رتبي اولوياتك

اش المهم عندك؟

اطفالك ووقت معاهم ولعبهم ولا بيت يلمع ومرتب وكل شيء في مكانه ؟

ولازم تعرفين انك اساس البيت وانت المهم ولو زعلتي وصارختي وكنت تعيسه البيت كله بيكون كذا

انت ساعدي نفسك وخففي عن نفسك محد بيساعدك غيرك،والحمدلله هالزمن فيه كثير اشياء تخفف وتساعدك

لا تعطين اكثر من طاقتك ولا تهلكين نفسك لا تخلين يومك كله مطارده وصراخ

اعرفي انك تحتاجين الراحه ومن حقك 

من حقك تنامين نوم مريح متواصل بدون ازعاج

بدون ترفيس

وتحتاجين وقت خاص تشحنين طاقتك فيه

طيب كيف؟ قوانين البيت بتساعدك

وترتيب يومك ووقتك،يعني ممنوع السهر لاطفالك وحتى انت بعد ممنوع تسهرين

واذا ناموا اطفالك وكنتي محدده لهم ساعه محدده باليوم بعدها يبدأ وقتك سوي فيه اللي تبين ونامي بعدهم بساعتين كذا

مو ينامون وتروحين تنظفين !!!!

هذا وقتك سوي فيه اللي تحبين

الطبخ استخدمي اشياء تساعدك،

اشتري خضار مجمده او انت جمدي وحطي باكياس 

تساعدك اكتبي وجبات الاسبوع كامل 

عشان ترتاحين من التفكير والقلق

 اطبخي طبق واحد تحضير السفره 

وترجيع المواعين خليهم يساعدونك فيه،

استخدمي اجهزه تساعدك وتخفف عنك 

وتقلل من الوقت والجهد

هذا مو مثاليه ترى

لكن انت ام عندك مسؤوليات كثير تحتاجين تنظيم 

تحتاجين صوره واضحه ليومك مو على البركه وتعيشين بقلق

اعرفي اذا كان كل شيء منظم وواضح

 رح ترتاحين ورح يخف الضغط صدقيني

اجلسي مع نفسك واكتبي كل شيء تبينه

 خلي كل شيء واضح قدامك

تتدرون وش اكثر عذر يستخدمونه الامهات او كل الناس ؟ 

مافي وقت

الا فيه ٢٤ ساعه بيومك اذا نظمتيها رح تلقين الوقت

اول شيء اتركوا الجوال هو الادمان والخراب وضياع الوقت،

 ناموا بدري واصحوا بدري ورح تشوفون البركة في حياتكم،

لو النوم مخربط طبيعي بتقولين مافي وقت وراح اليوم

ادمان الجوال جالس يسرق وقتنا وعمرنا اشيااء كثير

 ووقتنا مع اطفالنا وهو يزيد الضغط والعصبيه

 ويخلينا مالنا خلق ونكون ناس غير منجزين وطفشانين

استخدموا الجوال باعتدال واسمعوا الاشياء الايجابيه

 لا تسمعون للمحطمين

حطوا لكم اهداف اسبوعيه وشهريه

ترى لو انجزتي حتى لو هدف واحد رح يفرق بنفسيتك

مارسوا الرياضة او المشي

اخلقوا لكم عادة جديده كل فتره ومارسوها

تقبلي النقص تقبلي الاخطاء تقبلي الاشياء الطارئه

 الخارجه عن ارادتك المرض التعب النفسيه المتقلبه لاطفالك 

.. فيه امور تمر عليهم بحياتهم تخليهم كذا

فيه شيء من زمان ابي اقوله

ليش فيه امهات تفكر انها خارقه!

تفكر انه لازم هي تسوي كل شيء ليه ماتخلين اطفالك يساعدون ويسون؟عشان مايغلطون؟

او عشان الوقت ؟ او تبين كل شيء بسرعه؟

عادي لازم كذا البدايه كيف بيتعلمون؟

وفيه شيء مهم الطفل فيه طاقه ضروري

 يطلعها اذا بتعطينه جهاز عشان ترتاحين وتفتكين من حنته وازعاجه مارح ترتاحين اذا ترك الجاهز بيقوم يسوي لك حركات لانك كبتي طاقته،عندك حوش خليهم يومياً يطلعون

تقدرين تودينهم حديقه يومياً او كم يوم بالاسبوع وديهم،

وترى مو لازم تجلسين معاهم ٢٤ ساعه،

ضروري تبعدين عنهم شوي اتركيهم يلعبون لوحدهم،

وفري لهم كل شيء فيه تفريغ طاقه مو جهاز،

وفري لهم اللوان كراسات معجون رمل العاب تسلق العاب خيال،الجهاز حددي لهم وقت باليوم وفري لهم الكتب والقصص

اذا حسيتي نفسك منضغطه او معصبه ادخلي غرفتك فرغي غضبك باي شيء مو على اطفالك،تذكري انهم ضعيفين ومالهم ذنب،ماتقدرين تتحملين ادخلي وسكري على نفسك،عندك قلق او غضب خذي استشارات عالجي نفسك ساعدي نفسك اقرأي وتعلمي وتثقفي لاتقولين انا معصبه وبس

لا انت واعيه الان ومسؤوله عن اشخاص تغيري

ممارسة تمرين التنفس العميق رح يساعدك ويخفف عنك ، مارسي تمرين التأمل،ادخلي مكان هادي بدون اي مشتت خلي عقلك هااااادي مايفكر بولا شيء ريحيه لو ربع ساعه يومياً في البدايه بيكون صعب عليك لكن مع التمرين والتدريب رح يضبط

كل شيء في البدايه صعب بس يصير بالاخير اذا انت بغيتي

استغلي اوقات الاستجابه وادعي

الدعاء الدعااااء الدعاااااء اثره عظيم

بين الاذان والاقامه

يوم الجمعه

صلاة الوتر

اذا تقدرين صومي الخميس والاثنين

حاولي تقرين سورة البقرة يومياً او قسميها ٣ ايام او حددي لك ورد يومياً او احفظي قرآن

هالامور تهذب الروح والنفس وتريحك وتخفف عنك

ماعرف اذا كان كلامي مرتب بس اتمنى استفدتوا

 واتمنى فهمتوا علي .. اتمنى لكم من كل قلبي حياة سعيدة 

مطمئنه والله يألف بين قلوبكم وقلوب اطفالكم

هذا اللي تستحقونها انتم واطفالكم

عندك اي مشكله اطلبي المساعدة عادي

الان الزمن تغير وكل شيء بضغطة زر 

لا تتاخرين ولا تتجاهلين

باختصار

-وضع قوانين في البيت

-نوم بدري للجميع

-توكيل جميع الافراد مهام على حسب عمره

-وقت راحه و خاص فيك

-لعب حركي لاطفالك يومياً واستغليهم بتنظيف البيت وتقبلي النقص والاخطاء.

-عطي كل طفل وقت خاص فيه لوحده بدون مشتت

لو ربع ساعه يومياً ومو لازم تجلسين معاهم ٢٤ ساعه

-خذي استشارات

تتدرون انا مستحيل اقضي وقت طويل بالمطبخ

 ولا احب دايم اسوي طبخات سهله ومختصره وماتاخذ وقت

 حتى استخدم قدر كهربائي فرن فيه توقيت ويوقف بنفسه 

واقدر اطلع من البيت وارجع واكلنا جاهز خضار اشتريها 

واقسمها وافرزنها،غسالة اواني مهم وجودها،

حطي يوم بالاسبوع اجازة من الطبخ

ولازم كل البيت وجبه وحده 

مو تسوين لفلان وجبة والثاني وجبة والاب وجبة

اذا عندك اطفال كبار وكلي لهم مهات طبخ او يسوون اشياء بسيطه يعني بنتي من عمر صغير معلمتها تسوي لها بالبدايه توست ولبنه او مربى والان صارت تسوي لاخوها واكون مغسله لهم فراوله وتوت وخيار ياخذونها بعد،او جهزي لهم فطور في صندوق يصير بس يصحون تعطينهم اذا مالك خلق

عزيزتي

فيه امور توكلينها لغيرك مو لازم انت

وفيه امور لا لازم انتي تسوينها

بس المهم كل البيت يشارك ويتعاون

الحياه صح فيها صعوبات بس بيدك تسهلينها 

لاتخلين كل شيء عليك وتهلكين نفسك ولازم كل شيء بيرفكت وانت تسوينه ومحد يعرف،لا يعرفون عطيهم ومو لازم يسوونه نفس طريقتك عطيهم ورح يبهرونك

الموضوع كامل على تويتر

هنا

انتهى

لاتحرموني من تعليقكم شكرا لكم

وهنا متجر خاص بقصص الاطفال

يسعدني ويشرفني تشوفونه

ودعمه

مكتبتي الصغيرة

شكراً